Навіны Гайлянд Парк


Малебен за мір ва Ўкраіне

posted Aug 30, 2015, 9:48 AM by Belarusian Church   [ updated Aug 30, 2015, 9:49 AM ]

У нядзелю 23 жніўня 2015 л.Б. парафіяне храму Св. Жыровіцкае Іконы Божае Маці г.Гайлянд Парк (шт. Нью Джэрзі, ЗША) маліліся за мір ва Ўкраіне. Настаяльнік парафіі мітрафорны пратаярэй а.Зінові Жалабак пасьля заканчэньня Літургіі адслужыў Малебен за Ўкраіну і прывітаў украінцаў і ўсіх прысутных з днём Незалежнасьці Ўкраіны, які сьвяткуецца 24 жніўня, і пажадаў міру і спакою ва Ўкраіне. Таксама 25 жніўня сьвяткуецца дзень аднаўленьня Незалежнасьці Беларусі.


Прэзэнтацыя кніг у Гайлянд Парку

posted May 30, 2013, 11:38 AM by Belarusian Church

26 траўня 2013 году ў грамадзкай залі царквы Жыровіцкай іконы Божае Маці пасьля заканчэньня багаслужбы адбулася прэзэнтацыя дзьвюх кніг, напісаных прадстаўнікамі паваеннай хвалі эміграцыі , выдадзеных у Менску (Аляксандар Стагановіч "Успаміны пасла" 2011; Марыя Стагановіч " Мае ўспаміны" 2012. Выдавецтва “Лімарыус”).

Кнігі вяртаюць нас у перадваеннае жыцьцё Заходняй Беларусі, калі Аляксандар Стагановіч быў беларускім паслом у Польскім сойме, а яго жонка Марыя – захавальніцай народных традыцыяў і звычаяў ды любячай маці. 

Сваімі развагамі і ўспамінамі з прысутнымі падзеліліся людзі, якія асабіста ведалі аўтараў – актывістаў беларускага жыцьця на чужыне, хто спрычыніўся да падрыхтоўкі й выданьня кніжак, а таксама іх першыя чытачы.

Парафіяльнае сьвята ў Гайлянд Парку

posted May 30, 2013, 11:34 AM by Belarusian Church

Сьвяткаваньне Парафіяльнага сьвята адбылася ў нядзелю 19 траўня ў царкве сьв. Жыровіцкае Іконы Божае Маці ў г.Гайлянд Парк (шт. Н.Дж.). У Архірэйскай службе прынялі ўдзел Уладыка Сьвятаслаў, а.Зіновій - настаяцель Парафіі і сьвятары з розных Парафіяў. 


У часе Крыжовага ходу навокал храму чыталіся Дабравесьці на розных мовах. Кожны ўдзельнік сьвята атрымаў на памяць іконку сьв. Жыровіцкае Багародзіцы. 

Чытаньне Дабравесьця ў часе Крыжовага ходу

Пасьля набажэнства ў Парафіяльнай зале адбыўся сьвяточны абед, падрыхтаваны Сястрынствам. Прывітаньне выказалі прысутныя на сьвяце вернікі Парафіі Катэдральнага сабору зь Нью Ёрку. Уладыка Сьвятаслаў коратка распавёў пра беларускія цудатворныя іконы. Старшыня Парафіяльнае Рады сп-р Віктар Дубяга распавёў пра адведваньне вернікамі супольных службаў, якія ладзіліся ў часе Вялікага паста настаяцелем і сьвятарамі зь іншых Праваслаўных юрысдыкцыяў. 

Па традыцыі сьвяткаваньне скончылася латарэяй.

Вялікдзень у Гайленд Парку

posted May 7, 2013, 9:12 PM by Belarusian Church

Усяночную Службу ачоліў настаяцель царквы Святой Жыровіцкай Божай Маці айцец Зіновій Жалабак. У Службе яму дапамагаў сябра з Украінскай царквы айцец Андрыян і васьмёра хлапцоў прыслужнікаў. На Усяночнай акрамя парафіян прысутнічала шмат гасцей. Пасля асвячэння кошыкаў з яйкамі, Вялікоднымі булкамі і іншымі стравамі некаторыя вернікі засталіся у царкоўнай залі і вырашылі разгавіцца перад паездкай дахаты.








Расклад Вялікодных багаслужбаў - 2013

posted Apr 27, 2013, 5:43 PM by Belarusian Church

Беларуская праваслаўная царква 

сьв. Жыровіцкае іконы Божае Маці 

ў г. Гайлянд Парк (шт. Н.Дж.) 

віншуе ўсіх з надыходзячым 

В Я Л І К О Д Н Е М 

і запрашае на сьвяточныя набажэнствы : 


Красавік – 2013 – April

28 нд. ВЕРБНІЦА ...... Літургія і асьвячэньне вярбы ...... 10:00 раніцы 


Травень - 2013 - May

2 чц. Вялікі Чацьвер ........ Сьв. Пакуты Хрыстовы ......... 6:00 вечара 

3 пт. Вялікая Пятніца .................... Вячорня ....................... 6:00 вечара 
з вынасам сьв. Плашчаніцы 

4 сб. Вялікая Сыбота .......................... Паўночня ............... 11:30 уначы

5 нд. Уваскрасеньне Хрыстовае ....... Крыжовы ход ........ 00:00 уначы
В Я Л І К Д З Е Н Ь Ранішня і Літургія ...... 00:15 уначы 

6 пн. Вмч. Юрыя Пераможцы .......... Літургія ................ 10:00 раніцы 

11 сб. Сьвц. Кірылы Тураўскага (Парафіяльнае Сьвята ў Нью Ёрку) 

12 нд. Правадная Нядзеля ......... Літургія і Паніхіда ......... 9:00 раніцы 
Паніхіды на Беларускіх могліцах (Іст Брансуік) ..... 12:00 дня 

19 нд. Сьв. Жыровіцкае іконы Б.М. ....... Літургія .......... 10:00 раніцы
і сьвяткаваньне Парафіяльнага Сьвята 

ХРЫСТОС УВАСКРОС ! САПРАЎДЫ ЎВАСКРОС ! 

CHRIST IS RISEN ! INDEED HE IS RISEN ! 

Наш адрас: St. Mary of Zyrovicy church, 9 River Rd, Highland Park, NJ 
Тэл. 1-732-247 9173 , www.belapc.org

Запусты

posted Dec 2, 2012, 9:00 AM by News Staff Writer   [ updated Dec 2, 2012, 9:01 AM ]

Запусты на Калядны Пост адбыліся ў Нядзелю 24-ю пасьля Сёмухі, 18 лістапада 2012 г., у Парахвіі Сьвятое Жыровіцкае Іконы Божае Маці ў г.Гайлянд Парк (шт. Нью Джэрзі, ЗША). Увосені тут зьбіраецца найбольш парахвіянаў менавіта на Запусты, таму парахвіяльнымі ўладамі былі запрошаныя Архіяпіскап Сьвятаслаў Логін і Архіяпіскап Аляксандр Быкавец (кіраўнічы Япіскап УАПЦ у ЗША), якія й узначалілі Літургію. У часе набажэнства кіраўнік Парахвіі, пратаярэй а. Зінові Жалобак, за шчырую 15-гадовую пастырскую працу на ніве Хрыстовай ды з нагоды 90-гадовага і 70-гадовага юбілеяў Сабораў БАПЦ у Менску быў узнагарорджаны царкоўнай узнагародай – Крыжом з Прыкрасамі.

У багаслужбе таксама прынялі ўдзел пратаярэй а. Леанід Акаловіч (Менск, Беларусь) і сьвятары украінскіх Парахвій з розных штатаў ЗША (Нью Джэрзі, Нью Ёрк, Пэнсільванія, Мічыган).
 
У часе Літургіі

Уладыка Аляксандр прачытаў Дабравесьце па-беларуску, а ў канцы службы сказаў Казаньне. Уладыка Сьвятаслаў узнагародзіў Нагароднымі Граматамі БАПЦ трох парахвіянаў, якія найбольш ахвярна працуюць дзеля дабра гэтае Парафіі :
спадара Віктара Дубягу – старшыню Парафіяльнае Рады,
спадара Якуба Сапяжынскага – рэгента Хору,
спадарыню Людмілу Бакуновіч – старэйшую сястру Сястрынства Парахвіі.

Варта адзначыць, што нядаўна ў храме Сьв. Жыровіцкае Іконы Божае Маці ў Гайлянд Парку былі пастаўлены новыя ўваходныя дзьверы, кошты на якія былі сабраныя Сястрынствам.
 
Духавенства ў часе дабраславеньня абеда

Настаяцель, а. Зінові, падзякаваў гасьцям і парахвіянам за ўдзел у Багаслужбе і запрасіў усіх на абед у Парахвіяльную Залю, дзе былі падрыхтаваныя бліны, якія звычайна за беларускай традыцыяй пякуць на Запусты перад Калядным і Вялікім Пастамі. Таксама адбылася традыцыйная латарэя.
 
Больш фотаздымкаў можна паглядець па наступнай спасылцы:
 
 

Каляды ў Гайлянд Парку

posted Jan 18, 2011, 4:47 PM by Belarusian Church   [ updated Dec 2, 2012, 9:30 AM by News Staff Writer ]

Сьвяткаваньне Калядаў адбылася ў Парафіі Сьвятое Жыровіцкае Іконы Божае Маці ў г.Гайлянд Парк, штат Нью Джэрзі, ЗША.


Увечары 6 студзеня ў царкве адбылася архірэйская Ўсяночная служба, якая пачалася Вялікім Павячоррам зь Ліціёй, якую ўзначаліў япіскап Сьвятаслаў.
Пасьля набажэнства ў Парафіяльнай Зале адбылася посная вячэра, дзе акрамя поснае Куцьці, былі нарыхтавана посныя стравы.


У нядзелю 7 студзеня была адслужана архірэйская Літургія, пасьля якое вернікі сьвяткавалі сьвята Нараджэньня Хрыстовага, сьпявалі Калядкі.

Запрашаем у храм Божы на Багаслужбы

posted Jan 4, 2011, 3:12 PM by Belarusian Church   [ updated Jan 4, 2011, 3:20 PM ]

Паважанае cпадарства!

Парафіяльная Рада і сьвятар Беларускае Аўтакефальнае Праваслаўнае Царквы Сьв. Жыровіцкае Іконы Божае Маці ў Гайлянд Парку віншуюць Вас са сьвятам Нараджэньня Хрыстовага – КАЛЯДАМІ і жадаюць усім смачнае куцьці, вясёлых сьвятаў і шчасьця ў Новым 2011-м Годзе !

Запрашаем у храм Божы на Багаслужбы :


Студзень – 2011

6 чацьвер
Сьвяты Вечар - Архірэйская Ўсяночная - 6:00 вечара
КУЦЬЦЯ - 8:00 вечара

7 пятніца
К А Л Я Д Ы - Архірэйская Літургія - 10:00 раніцы

9 нядзеля
Сьвятых Богаайцоў - Літургія - 10:00 раніцы

16 нядзеля
Нядзеля перад Вадохрышчам - Літургія - 10:00 раніцы

19 серада
В А Д О Х Р Ы Ш Ч А - Літургія і Вял. асьвячэньне вады- 10:00 раніцы

23 нядзеля
Нядзеля пасьля Вадохрышча - Літургія - 10:00 раніцы

Абыход сьвятаром са сьвянцонай вадой памешканьняў парафіянаў будзе адбывацца з 19 да 27 студзеня – па запросінах.


Parish of St. Mary of Zyrovicy, 9 River Road, Highland Park, N.J. 08904, USA
Tel:1.732.247 9173 , www.belapc.org

“Дзяды” ў Нью Джэрзі

posted Nov 13, 2010, 2:18 PM by Belarusian Church   [ updated Dec 2, 2012, 9:34 AM by News Staff Writer ]

7 лістапада пасьля Сьв. Літургіі і Паніхіды ў царкве Сьв. Жыровіцкае Іконы Божае Маці ў г.Гайлянд Парку (штат Нью Джэрзі, ЗША) вернікі паехалі на Парахвіяльныя Могілкі, што знаходзяцца непадалёк, у г.Іст Брансуік, каб памаліцца за супачылых сваякоў на месцы іх апошняга зямнога прыпынку. 

Пасьля Паніхіднае Ліціі каля Помніка ўсім загінуўшым змагаром за Беларусь і каля супачылых япіскапаў, пратаярэй а.Зінові з хорам і вернікамі абышоў магілы са сьпевам “вечная памяць”. 

Абыход настаяцелем Парафіяльных могліцаў Беларускае Аўтакефальнае Праваслаўнае Царквы адбываецца двойчы на год – на Дзяды і на Радаўніцу, куды прыязджаюць нашыя суайчыньнікі з розных куткоў Амерыкі, каб наведаць сваіх супачылых сваякоў.



Зь любоўю і верай у сьветлае

posted Oct 12, 2010, 5:45 PM by Belarusian Church


19 верасьня ў Хайлэнд Парку прайшла пэрсанальная выстава твораў беларускай мастачкі Любові Карпавай. Таксама Беларуская грамада Нью-Джэрсі і Нью-Ёрку падрыхтавала ў гэты дзень сяброўскі пікнік.

Яшчэ напрыканцы традыцыйнай ранішняй багаслужбы сьвятар Беларускай Аўтакефальнай Праваслаўнай Царквы айцец Зінові адзначыў, што творы спадарыні Любові зробленыя з неверагодным пачуцьцём густу, цеплынёй ды высокім майстэрствам. Узгадаўшы адну са сваіх мінулых пропаведзяў пра тое, як Бог раздаваў таленты людзям, айцец Зінові сказаў, што, гледзячы на зробленае нашай беларускай мастачкай, становіцца відавочным, што свой талент яна не толькі не закапала, а надзеленая ім Богам, выкарыстоўвае і разьвівае – тое, што павінен рабіць кожны з нас.

Спусьціўшыся ў грамадзкую залю, кожны з больш чым паўсотні наведвальнікаў меў шыкоўную магчымасьць пераканацца ў гэтым: 30 вышываных твораў, зробленыя Беларускай за апошняе дзесяцігодзьдзе, якія яна прэзэнтавала ў той дзень, дэманстраваліся ў такой колькасьці для публікі ўпершыню. І гэта рабілася як раз у той час, калі адзначаецца сьвята Прасьвятой Багародзіцы - большасьць твораў выставы ў сваёй назве ўключала яе імя.

Такім чынам, 25-я выстава Беларускага Музэю ў Нью-Ёрку стала першай пэрсанальнай для Любові Карпавай – яшчэ адной беларускі, якая жыве ў ЗША і адгукнулася на прапанову пазнаёміць Беларускую грамаду са сваёй творчасьцю.



Коратка распавёўшы пра факты сваёй біяграфіі: нараджэньне ў Гомлі, пераезд у Менск, а пасьля ў ЗША, вучобу ў наргасе, працу інжынэрам, спадарыня Любоў больш увагі надала ў выступе свайму творчаму шляху. Захапленьне тканінамі з юнацтва прывяло яе ў гурток, дзе яна дапамагала ўжо іншым – дзеткам ды часта і іх бацькам таксама – засвойваць своеасаблівую беларускую тэхніку вышываньня. Стварэньне мастацкіх кампазыцыяў і расшыванак ды пляценьне кветак – Беларускія традыцыі, якія ўходзяць каранямі ў глыбокую даўніну.



Пацеркавае руказдольства прыйшло да нас зь гістарычных глыбіняў: майстэрства пляценьня, ткацтва, вышываньня спрадвеку перадавалася ў спадчыну ў нашай краіне.

А наогул вырабы з пацерак, вядомыя яшчэ ў Старажытным Эгіпце й Індыі, да сёньня аздабляюць вопратку народаў Бліжняга й Дальняга Ўсходу, Афрыкі й Індыі, Амэрыканскага кантынэнту й выспаў Ціхага Акіяну (Акіянія), Эўропы ды Азіі.

Беларускія пляцёнкі й гарлячкі маюць у сьвеце сваіх сваякоў: эфіёпскія чале, iндыйскія мала й хар, кубінскія каяр і гаргантыя, ангольскія місанга, баўгарскія, румынскія й малдаўскія гарданы й згарды, украінскія гэрданы й сылянкі, славацкія нагрдэліікі, таджыцкія гулубанд і фарал, узбэцкія зэбігардан, жмудзкія каралінас. Разнастайныя паводле формы, назваў, арнамэнтацыі, калярыту, кампазыцыі й тэхнікі выкананьня, яны сьведчаць пра прыродны нацыянальны талент, мастацкі густ і майстэрства іхных, найчасьцей безыменных, аўтараў.



Гісторыя вышываньня пацеркамі ў Беларусі сягае ў далёкую мінуўшчыну. Ці ня першыя зьветкі пра гэта датычаць тэрыторыі Радзімічаў (сучаснай Гомельшчыны), дзе ў пахаваньні ХІ стагодзьдзя быў знойдзены галаўны ўбор, аздоблены на йлбе паласой рамбічных пацерак цынна-алавянага (алавяна-сьвінцовага) сплаву.

ІХ-ХІІ стагодзьдзямі датуюцца зьвесткі пра пацеркавыя ўпрыгожаньні вопраткі на тэрыторыях земляў якія тады знаходзіліся пад Беларускім уплывам - Гэрцыке й Кукенойс (латыскае ніжняе Падзьвіньне). Там у пахаваньнях былі знойдзеныя тканыя вянцы, упрыгожаныя бронзавымі пакручалкамі (сьпіралькамі) й пацеркамі.

У Беларусі апошніх двух-трох стагодзьдзяў жаночыя ўпрыгожаньні з пацерак у выглядзе вузкай узорыстай стужкі, якая шчыльна прылягала да шыі, а таксама закругленых каўняроў былі найбольш папулярнымі на Гарадзеншчыне й Гомельшчыне. Гэта, згаданыя ўжо пляцёнкі (ад спосабу вырабу) й гарлячкі (ад месца нашэньня на шыі). Ад іх паходзяць, запазычаныя яшчэ ў ХVII стагодзьдзі ў Беларусаў жмудзкія каралінэс, што былі надзвычай папулярнымі на прылеглых да Беларусі паўдзённа-усходніх жмудзкіх землях.



У ХІХ стагодзьдзі пацеркамі й трапецыяпадобнымі падвескамі любілі расшываць хусткі Беларускі Смаленшчыны.

У нашым часе пацеркавыя вышыўкі як элемэнт народнага строю, папулярныя ў вёсцы Неглюбка, што пад Веткай на Гомельшчыне. У музэях Гомельшчыны можна пабачыць вышыўкі пацеркамі нашых сучасьніцаў Людзьмілы Сушко, Сьвятланы Бацуновай, Натальлі Лагуты, Веры Самасаднай.



Такім чынам зараз у Беларускім замежжы гэтую традыцыю працягвае таксама Любоў Карпава, што сымбалічна, народжаная ў Гомлі.



Але да тых працаў, якія спадарына Люба стварае сёньня, быў доўгі жыцьцёвы шлях і пераасэнсаваньне таго, што адбываецца навокал. Пасьля 46 гадоў жыцьця на Бацькаўшчыне яна пераехала ў ЗША у 1993 годзе. Атрымаўшы прафэсыю касмэтоляга і пасьпяхова займаючыся прыватным бізнэсам, яна ўсё ж працягвала шукаць тое, што не давала ёй пакою і што дазволіла б ёй выкарыстаць свой творчы патэнцыял поўнасьцю.

Заўсёдныя амэрыканскія праблемы – недахоп часу і вольных імгненьняў – дазволілі вярнуцца да актыўнай творчасьці праз 8 гадоў - у 2001-м. Штуршком стаў падарунак адной з сябровак. Абраз Божай Маці стаў тым натхняльнікам, якія абудзіў ізноў у Любові Карпавай творцу: просьценькая выява на паперы абудзіла ў ёй даўнюю мару вышыць гэткі ж абраз пацеркамі (бісерам) на тканіне.

Потым зьявіліся іншыя абразы. Нястомная ў сваёй працы майстрыха вышывае практычна ў любых умовах: падчас сямейнага збору ля тэлебачаньня, на самоце ўночы, у вольную хвіліну днём. Кожны з твораў патрабуе асаблівага падыходу і, па словах аўтаркі, на стварэньне адной вышыванкі ў яе ўходзіць каля аднаго месяцу.



Вышытыя на тканіне пацеркамі й залатой ды срэбнай ніткай ейныя творы нясуць у сабе цеплыню Беларускай гасьціннасьці, адкрываюць скарбы Беларускай душы, змушаюць думаць пра вечнае.

На 29-ю Сустрэчу Беларусаў Паўночнай Амэрыкі ў Нью-Брансуіку Любоў Карпава прыйшла паводле закліку сэрца. Там, два тыдні назад, і тут у беларускай царкве мастачцы лёс падараваў новыя сустрэчы і знаёмствы. І па яе словах, менавіта яны ў спалучэньні зь Беларускасьцю душы падказалі ёй два новыя накірункі для творчасьці: цяпер у плянах майстрыхі вышываньне абразоў з выявамі Беларускіх сьвятых, а таксама Беларускіх сьвятыняў – сабораў ды цэркваў, гістарычных і цяперашніх, якімі так багата наша Беларусь.

Добрай творчай дарогі Вам, спадарыня Любоў!

Пасьля афіцыйнай часткі мерапрыемства кожны з прысутных мог пэрсанальна пазнаёміцца з мастачкай, задаць ёй пытаньні, выказаць свае меркаваньні наконт працы творцы.

Цёплая атмасфэра ў залі стварылася яшчэ і дзякуючы зладжанаму пікніку з лятарэяй ды вясёлымі і час ад часу даволі шумнымі размовамі Беларусаў Амэрыкі.



Беларускі Музэй у Нью-Ёрку выказвае падзяку за дапамогу ў арганізацыі выставы Парафіяльнай Радзе Царквы Царква Сьвятой Жыровіцкай Іконы Божай Маці ў Хайлэнд Парку.

www.belmov.org

1-10 of 13