Рэлігійная Грамада Сьвятое Афрасіньні Полацкае ў Менску / Parish of Saint Euphrosyne of Polatsk in Miensk > Навіны Парахвіі / Parish News >
Навіны-Менск
Ушанаваньне памяці Мітрапаліта Мельхісадэка
17 траўня 2014 года ад Н. Х. ў дзень сьветлай памяці святарамучаніка Мельхісадэка Паеўскага, Мітрапаліта Менскага і Беларускага, у Менску Літоўскім вернікі парафіі Сьвятой Афрасіні Полацкай правялі акцыю памінаньня першага ярарха БАПЦ ў дзень ягонай пакутнай сьмерці ў Маскве ў 1931 г. Акт памінаньня адбываўся ў былым архірэйскім падвор'і ля Дома афіцэраў, дзе на адным з царкоўных будынкаў знаходзіцца памятная дошка-гарэльеф у гонар святарамучаніка Мельхісадэка.  Якраз каля гэтага памятнага знаку і была зьдзейсьнена малітва за Мітрапаліта Мельхісадэка, прасьпявана "Вечная Памяць" і ўскладзены жывыя кветкі ды зробленыя напамяць фатаздымкі. Пасьля заканчэньня акцыі трое вернікаў і айцец Леанід Акаловіч былі затрыманыя амапацоўцамі і адвезеныя ў міліцэйскі пастарунак Ленінскага раёну г. Менска "для выясненія лічностей". Пасьля абшукваньня і апытаньня-"выясненія лічностей" затрыманыя былі неўзабаве адпушчаныя на свабоду.  Акрамя таго, у самой Сьвята-Афрасінінскай суполцы была спраўлена яшчэ і багаслужба і Ліція ў знак памяці стмч. Мельхісадэка пры партрэце сьветлай памяці Мітрапаліта Менскага і Беларускага, які выканаў быў раней наш вернік-мастак Гянадзь Дрозд. Закончыўся Дзень памяці Сьвятога мучаніка за БАПЦ Мельхісадэка застольнай гутаркаю пра значэньне, ролю і спосабы ўшанаваньня яго ў БАПЦ і памінальнаю вячэраю. |
Другія Мельхісадэкаўскія чытаньні
21 красавіка 2013 года ў прыходзе імя Сьвятое Афрасіні Полацкае БАПЦ адбыўся нядзельны малебен у гонар айцоў-заснавальнікаў БАПЦ і другія Мельхісадэкаўскія чытаньні, прысьвечаныя памяці Мітрапаліта Менскага і Беларускага Мельхісадэка (Міхала Паеўскага).  Са зьмястоўнымі і цікавымі дакладамі выступілі вернікі прыходу БАПЦ і госьці, запрошаныя на чытаньні: Мікола Бамбіза – “Жыцьцёвы шлях Мітрапаліта Мельхісадэка (М. Паеўскага)”; Гянадзь Драздоў – “Вобраз Мітрапаліта Мельхісадэка ў жывапісе” (Г. Драздоў прэзентаваў свой мастацкі твор для БАПЦ – партрэт Мітрапаліта Мельхісадэка); Анатоль Валахановіч – “Леў Сямёнавіч Паеўскі – сьвятар, гісторык, археолаг, краязнавец, царкоўны дзяяч – бацька Мітрапаліта Мельхісадэка” і “Камянецкі Сьвята-Сямёнаўскі праваслаўны храм”; скульптар Генік Лойка – “Вобраз Мітрапаліта Мельхісадэка ў медальерным мастацтве” (Г. Лойка падрабязна распавёў прысутным, як ён увасобіў вобраз Мітрапаліта Мельхісадэка ў бронзавым медалі); Францішак Корзун – “Стан праваслаўнае царквы ў Беларусі-Ліцьве ў пачатку XX стагодзьдзя”; пратаярэй Леанід Акаловіч – “Служка Божы Мітрапаліт Менскі і Беларускі Мельхісадэк” і “ Радавод Паеўскіх і сямейныя фотаздымкі”.  Слухачы шмат даведаліся новага, невядомага дагэтуль пра Мітрапаліта Менскага і Беларускага Мельхісадэка, пра яго бацьку Льва Паеўскага і пра іншыя цікавыя факты з жыцьця Паеўскіх. Дакладчыкам быў зададзены шэраг пытаньняў.  Другія Мельхісадэкаўскія чытаньні ў Менскай Афрасінінскай суполцы закончыліся сьпяваньнем царкоўнага гімну “Магутны Божа” і частаваньнем. Анатоль Валахановіч 21.04. 2013 |
Мастацкая выстава суполкі “Пагоня” ў Менску
Вечарам 18 студзеня 2012 г. у Рэспубліканскай мастацкай галерэі Беларускае Суполкі Мастакоў у Менску адкрылася выстава “Другі фэст беларускага духоўнага мастацтва”, арганізаваная пад эгідай суполкі “Пагоня”, якая будзе працаваць да 29 студзеня. На ёй прысутнічалі й вернікі БАПЦ: мастак сп-р Г.Драздоў – кіраўнік мастацкай суполкі “Пагоня”, сп-р А.Валахановіч, сп-ня А.Сакалоўская, сп-р У.Ліпскі, сп-р М.Бамбіза. Выставу асьвяціў а.Леанід Акаловіч.  Як падкрэсьліваюць арганізатары фэсту, яго трэба разглядаць як сьвята і пацьверджаньне незьмянлівасьці хрысьціянскіх каштоўнасьцяў, здабытых вялікай цаной і занатаваных крывёю Ісуса Хрыста і яго пасьлядоўнікаў. Гэта сьвята аднадумцаў, людзей родных па духу і сьветапагляду, якія жадаюць падзяліцца радасьцю сваіх мастацкіх адкрыцьцяў і здабыткаў зь іншымі людзьмі. |
За безьядзерны рэгіён
29 і 30 верасьня 2011 г. ў Сойме Летувы ў Вільні праходзіла міжнародная канфярэнцыя "За бязьядзерны рэгіён!", у якой прыняла ўдзел і дэлягацыя ад БАПЦ ў складзе правялебнага япіскапа Віленскага Ўладыкі Серафіма (Чыкіты), айца Леаніда Акаловіча і намесьніка царкоўнае рады менскае суполкі Сьвятой Афрасіні Полацкае Гянадзя Драздова. Наша дэлягацыя актыўна ўдзельнічала ў выпрацоўцы і падпісаньні выніковых дакументаў канфярэнцыі "Ліста за спыненьне будаўніцтва Астравецкай (Беларусь), Вісагінскай (Летува) і Балтыйскай (у Калінінградскай вобл. Расеі) атамных электрастанцый" і "Дэклярацыі Грамадскай кампаніі "За бязьядзерны рэгіён!". 6--8 сьнежня 2011 г. айцец Леанід Акаловіч быў удзельнікам новай міжнароднай карфярэнцыі "Атамная энэргетыка -- выклік навакольнаму асяродзьдзю, здароўю чалавека, эканоміцы і праву", якая праходзіла ў залах паседжаньняў Сойму Летувы і муніцыпалітэту Вільні. Было заслухана і абмеркавана дзясяткі дакладаў і паведамленьняў вучоных зь Беларусі-Літвы, Летувы, Лацьвіі, Швецыі, Фінляндыі, Расеі, Чэхіі, Нямеччыны, Нарвегіі, Вялікабрытаніі і прынята адпаведная рэзалюцыя супраць будаўніцтва ў Прыбалтыйскім рэгіёне Астравецкай (Беларусь), Вісагінскай (Летува) і Балтыйскай (Калінградская вобл. Расеі) атамных электрастанцый. Удзельнікі канфярэнцыі стварылі яшчэ адзін Міжнародны Грамадскі Камітэт "За бязьядзерны сьвет" на чале з прафесарам Юрыем Лепіным (Беларусь), у які ўвайшоў таксама як член ад царкоўных арганізацыяў і айцец Леванід Акаловіч. |
Мастацкая выстава
12 лістапада 2011 г. ў Койданаўскай раённай бібліятэцы Менскай вобласьці прайшлі адчыненьне юбілейнай выставы і вечарыны тамтэйшае мастачкі Галіны Мініч пад назваю "Жывапіснае натхненьне". На пачатку айцец Леанід Акаловіч выславіў малітву за Беларускі Народ і асьвяціў выстаўленыя на паказ жывапісныя творы Г. Мініч, якая працуе тут як мастак-афармляльнік. Вяла вечарыну яе дачка Марыя Мініч, таксама мастачка і мастацтвазнаўца (яе бацька таксама быў мастаком). Галіна Мініч стварае ня толькі жывапісныя палотны - пяйзажы роднага краю, але і піша іконы. З добрымі словамі пра творчасыць мастачкі Галіны Мініч выступілі на вечарыне сьвятары Сьвята-Пакроўскай Койданаўскай царквы Павел і Барыс Паўтаржыцкі, айцец Леанід Акаловіч і пісьменьнік-журналіст Анатоль Валахановіч. |
Ліція і малітва ў Курапатах
30 кастрычніка 2011 г. ў нядзелю вернікі суполкі Сьвятой Афрасіньні Полацкай зь Менску прынялі ўдзел ў масавым шэсьці апазіцыі з цэнтру сталіцы ў Курапацкі лес да магілаў расстраляных бальшавікамі тысячаў людзей. Калона была хораша аздоблена бела-чырвона-белымі сьцягамі, транспарантамі з словамі ДЗЯДЫ... Маніфестанты несьлі ў Курапаты новыя крыжы, каб іх усталяваць у месцах масавых расстрэлаў бязбожнікамі бязьвінных ахвяраў сталінізму. Пасьля мітынгу на курапацкай Галгофе ля вялікіх трох Крыжоў сьвятар БАПЦ ярэй Леанід Акаловіч справіў Ліцію па загінулых тут пакутніках і Малітву за ўсіх рэпрэсаваных і нявінна забітых у 30-х - 50-х гадох ХХ ст. пры сталінскім рэжыме.  Асьвячэньне крыжоў у Курапатах 30.10.2011 Затым айцец Леанід сказаў слова пра рэпрэсіі тагачаснай бязбожнай улады над сваімі мірнымі суайчыньнікамі, пра тысячы расстраляных, а пасля сьмерці дэспата-Сталіна рэабілітаваных як нявінных... На заканчэньне памінаньня Дзядоў - курапацкіх пакутнікаў а. Леанід асьвяціў дзясяткі новаўсталяваных сёньня й крыху раней крыжоў на месцах расстрэлаў і пахаваньня людзей Божых розных нацыяў, прафесіяў і станаў... Каля галгофскіх вялікіх крыжоў, ля памятнага каменя-валуна і многіх іншых крыжоў гарэлі лямпады-сьвечкі і ляглі жывыя кветкі.. .  Асьвячэньне крыжоў у Курапатах 30.10.2011 |
Паломніцтва ў Чарнігаў
3-4 верасьня 2011 г. вернікі рэлігійнае Грамады Сьв. Афрасіньні Полацкае г. Менска БАПЦ зьдзейсьнілі паломніцтва ў старажытны горад Чарнігаў (Украіна), дзе адведалі шмат праваслаўных сьвятыняў, сярод якіх – пяць вельмі старажытных храмаў (ХІ – ХІІ ст.ст.), “Антоніевы пячоры” і іншыя манастыры, а таксама магілу беларускага япіскапа Германа (хіратанізаванага ў часе Другое сусьветнае вайны). Айцец Леанід Акаловіч прыняў удзел у набажэнствах у адным з велічных чарнігаўскіх храмаў, дзе паломнікі зь Беларусі спавядаліся і прынялі сьвятое прычасьце. На Бацькаўшчыне багаслужбы ў Грамадах БАПЦ ня ёсьць такімі ўрачыстымі з-за таго, што ўлады Беларусі адмаўляюцца іх рэгістраваць і вернікі Беларускае Царквы пазбаўлены права вольна спавядаць веру сваіх продкаў.  Паломнікі ў манастыры "Антоніевы пячоры" |
Гуманітарная дапамога для Нясьвіжскага дому-інтэрнату
22 жніўня 2011 г. дэлегацыя Беларускае Аўтакефальнае Праваслаўнае Царквы перадала гуманітарную дапамогу Нясвіжскаму дому-інтэрнату для састарэлых і інвалідаў, які знаходзіцца ў вёсцы Асмолава Нясьвіжскага раёну Менскае вобласьці, Беларусь. Сьвятары і вернікі БАПЦ азнаёміліся з умовамі жыцьця насельнікаў інтэрнату, якіх там знаходзіцца каля 230 чалавек.  У актавай зале Ўладыка Сьвятаслаў і а.Леанід супольна з вернікамі рэлігійнае Грамады Сьв. Еўпрасіньні Полацкае г. Менску (якой пакуль адмоўляюць ў рэгістрацыі) і прысутнымі насельнікамі і персаналам адслужылі Малебен за Беларускі Народ. Пасьля чаго сьвятары сказалі словы да прысутных. Кошты на гэтую дапамогу сабрала Парафія Сьв. Кірылы Тураўскага БАПЦ г. Таронта (Канада). |
Ушанаваньне ахвяраў Катыні
23 жніўня 2011 г. вернікі рэлігійнае Грамады Сьв. Еўпрасіньні Полацке г.Менску Беларускае Аўтакефальнае Праваслаўнае Царквы прынялі ўдзел у паездцы дэлегацыі зь Беларусі да мемарыялу ахвяраў сталінскага рэжыму, які знаходзіцца каля вёскі Катынь на Смаленшчыне, дзе пахаваныя тысячы афіцэраў Польскае арміі, растраляных вясной 1940 г. Часткаю гэтых ахвяраў ёсьць і беларусы, якія ваявалі ў Польскай арміі.  Япіскап Сьвятаслаў і а. Леанід Акаловіч адслужылі Ліцію за супакой растраляных камуністычным савецкім рэжымам на так званым “польскім” баку мемарыялу. Таксама была адслужаная засупакойная Ліція на “савецкім” баку мемарыялу, дзе безназоўнымі ляжаць растраляныя ў 1920 – 30-х г.г. жыхары Смаленшчыны, якая ў большасьці ёсьць беларускай этнічнай тэрыторыяй.  Пасьля гэтага ўдзельнікі пілігрымікі наведалі месца загібелі вясной 2011 г. ўрадовае дэлегацыі Польшчы на чале з прэзыдэнтам, якія накіровываліся да Мемарыялу ў Катыні. |
Гуманітарная дапамога для дзяцей-інвалідаў
1 жніўня 2011 г. дэлегацыя Беларускае Аўтакефальнае Праваслаўнае Царквы перадала невялікую гуманітарную дапамогу Журавіцкаму дому- інтэрнату для дзяцей з псіха-фізычнымі адхіленьнямі, які знаходзіцца ў Рагачоўскім раёне Гомельскай вобласьці.  Дырэктар азнаёміла гасьцей з вялікай гаспадаркай дому-інтэрнату, у якім стала знаходзіцца каля 300 дзяцей-інвалідаў. У актавай зале сірацінца Ўладыка Сьвятаслаў, а.Леанід Акаловіч і двое вернікаў рэлігійнае Суполкі Сьв. Еўпрасіньні Полацкае ў Менску разам з прысутнымі адслужылі Малебен за выздараўленьне хворых, пасьля якога была перададзена невялічкая дапамога, кошты на якую сабрала царква Сьв. Кірылы Тураўскага г. Таронта ў Канадзе. Пасьля чаго дзеці паказалі кароткі канцэрт гасьцям і персаналу.  Беларусы-эмігранты, якія жывуць у Эўропе, Амерыца, Аўстраліі, маючы патрэбу сувязі з Бацькаўшчынай, шмат дапамогі пачалі аказываць суайчыньнікам асабліва пасьля Чарнобыльскай аварыі, дасылаючы розную медычную і матэрыяльную дапамогу на шпіталі, дзіцячыя і старчаскія дамы ў Беларусі. Так, толькі Парафія БАПЦ у Таронта, штогод надае такую гуманітарную дапамогу. |
1-10 of 11