 Дастойнаму сьвятарству й вернікам Беларускае Аўтакефальнае Праваслаўнае Царквы, якія жывуць на Бацькаўшчыне і на Чужыне.
“...Хто верыць у Мяне, калі і памрэ,- ажыве” (Ян 11:25)
Кожны год, сьвяткуючы галоўнае Хрысьціянскае Сьвята, не перастаем дзівавацца тайне Ўваскрасеньня Хрыста, бо гэтая падзея ёсьць доказам вечнага жыцьця, якая дае нам сілы перамагаць у сабе зло, імкнуцца дасягаць духоўнай вышыні і лучнасьці з Богам. У гэтым годзе беларусы сустракаюць Вялікдзень, як і мінулыя Каляды, са смуткам у душы, бо ў часе Вялікага і Каляднага пастоў у Беларусі пралілася кроў. У абаіх выпадках ахвяры пакутвалі за свой народ, бо на іхным месцы мог апынуцца кожны. Асабліва мы сумуем па загінуўшым, але не таму, што ня верым у іхнае вечнае жыцьцё, а таму што нам боляча разлучацца з-за любові да іх - нашых суайчыньнікаў. Уваскрасеньне Хрыста даказвае, што Ён ёсьць Богам і Ягонае вучэньне ёсьць сапраўдным і Ён, як Уладар Нябесны, не памыляецца. А памыляцца і несьці зло людзям могуць уладары зямныя, якія , не карыстаючыся Божымі Запаветамі, ствараюць “Чарнобылі” і “Курапаты”, і якія часам не жадаюць, каб народ меў тую духоўную сілу, якая яднаючы яго, дае яму ўпэўненасьць у неабходнасьці змагацца за праўду і разуменьне таго, што толькі свая нацыянальная дзяржаўнасьць зможа абараніць яго як этнас, і што чужыя Цэрквы ня будуць маліцца за яго. Але ў сьвятле Хрыстовае перамогі жыцьця над сьмерцю, мы бачым, што дабро мацней зла. Таму ў сваіх малітвах папросім Госпада, каб шлях, па якім Беларускі Народ нясе свой Крыж дзеля свайго сцьвярджэньня ў вечнасьці, быў меней пакутным. І радасна павіншуем адзін аднаго: Хрыстос Уваскрос ! Уваскрэсьне Беларусь !
|
Навіны - Галоўная >