Пасьля Набажэнства, у Парафіяльнай Зале адбыўся сьвяточны абед з розных беларускіх страў, падрыхтаваны Сястрынствам Парахвіі і ўрачыстая частка. Парахвіянаў і гасьцей з днём Сьвятога Кірылы Тураўскага павіншаваў старшыня Парафіяльнай Рады др. Расьціслаў Гарошка. Свае віншаваньні вернікам выказалі старшыня Беларуска-Амерыканскага Задзіночаньня сп-р Вячка Станкевіч, сакратар Кансысторыі БАПЦ сп-р Якуб Сапежынскі. Япіскап Сьвятаслаў паказаў экзэмпляры розных выданьняў Сьвятога Пісьма з царкоўнае бібліятэкі, выдадзеных на беларускай мове: ад рэпрынтавага выданьня Бібліі Ф.Скарыны і да апошніх выданьняў у Беларусі. Многія выданьні перакладаліся і былі выдадзены Беларускай дыяспарай у 1950 – 80-я г.г., калі на Бацькаўшчыне рэлігія перасьледавалася, сярод якіх: Евангельле і Біблія Янкі Станкевіча, Пётры Татарыновіча, Уладзіслава Чарняўскага, Яна Пятроўскага, Майсея Гітліна, Міхала Міцкевча (брата Я.Коласа, парахвіяніна Катэдральнага Сабору). Кожны мог перагледзіць гэтыя выданьні. Яшчэ доўга не расходзіліся, абмяркоўваючы царкоўныя і грамадзкія беларускія справы, вернікі, для якіх Катэдральны Сабор ёсьць ня толькі храмам Божым, а й Беларускім Домам на Амерыканскім кантыненце.