Поучение Курила мниха велми полезно ("Аще человек убог ходит или алчет и жаждет Христа ради…") Аще человек убог ходит или алчет и жаждет Христа ради, то на небесех обогатеет и милости Божиа насытитися имат и райская пища. Аще ли человек зде скорбеть будеть, и поносим, и оклеветаем, презрим и изгоним правды ради, то почестим будеть на небесех от аггел и радоватися и веселитися имат с человеки праведными. Аще ли человек зде ненавидим бывает от человек или бьють его Христа ради, то възлюблен будеть Отцем небесным на небесех и радоватися имат с аггелы и почивати в раю. Аще ли человек печален пианица был будет и неподобный ядьца, то онамо алчен будет и жаден райскыа пища. Иже кто зде немилостив был, страннаго не въведе в дом свой и беднаго не помиловал, то онамо сам не помилован будеть от Бога и от аггел не приятен в Царство Небесное. Иже кто человек зде блуд творил и прелюбодейство, то онамо не имать видети лица Божиа, ни Царства Небеснаго наследити, но в огненую реку възвръжен будеть. Аще человек вся сиа грехы непобедныя творить и не покается чисто от сердца с верою и с плачем, то неизмолим суд обрящет в Страшный день от пред [...] Горе будет не послушающим книжнаго учениа ни отцы своих духовных, горе пиющим вино с гусльми и плясанием, горе сопелником и слушающим их: дьяволу есть величание, а христианом пагуба. Публикация по изданию: Никольский Н. К. Материалы для истории древнерусской духовной письменности. СПб., 1907. С. 86—87. |
|
|