Христос Господь, свет великий, в сей светлый день пришел есть к Иордану. Благовещу вы, братие: Аз бо есмь свет, - рече Спас. Приимем убо Его с радостию, хвалящи и веселящеся духом. Днесь бо есть пришел в Иордан, хотя погрузити врагы нашя и супостаты, а нас крещением омыти и очистити от грех, Сей бо грехы нашя на Ся взя и тако врага миру сему потопи и очистив водныя источники, очисти душя человеческыя и к чюдесем приложи болшаа чюдеса. Днесь бо земля и море Христа Владыкы благодеание разделиста, и весь мир радости наполнися. И минувшаго праздника честнаго днешний праздник показаеть болшаа чюдеса. В минувший бо Рождества Господа и Спаса нашего земля радовашеся, в яслех держащи Владыку всея твари, а в днешний праздник святых богоявлений море зело ся радуеть с Иорданом, священнаа благословениа приемля. В минувший праздник несъвершен младенец видети беаше, наше несъвершение сведетельствуя, а в днешний день праздник съвершен ся явить, иже от съвръшена съвершен показает. Отнуде родившагося яви, на востоце звезда показавшися, а зде крестящемуся сведетельствуеть с высоты родивый Отец. Отнуде влъсви от востока пришедше, акы царю дары принесоша, а зде аггели с небес пришедше, акы Богу подобну службу послужиша. Тамо вязаху Его пеленами узы, а зде отрешаеть греховныя съузы. Идете убо видите преславнаа дела: солнечнаго солнца в Иордане омываема и огнь, в воде куплющься, и на Бозе человек руку си полагающь! Днесь тма всех бед отгонится, днесь прелестнаа мъгла расходится, днесь бесветный мир спасеным светом освещается. Днесь бесплотный фараон погружается, днесь бесовьскаа оружиа топнут, днесь разумный Моиси станы вся преводит сквозе воды. Днесь человечество страстий бернотвореных свобождаеть, днесь отходит от Египта, еже есть тма и ад, в немже есть многостенание, пусто оставляет. Днесь Давид истинуя и достойне хвалится, рекый: Омыеши мя и паче снега избелею! Поистине бо днесь Христос, в водах крестяся, омывает ны, паче снега убеляа! Да сего ради вся тварь днесь хвалящи Крестящагося, вопиет глаголющи: Благословен Грядый во имя Господне! Бог Господь и явися нам! Благословен Грядый всегда, а никогдаже не оставя нас; небо се первее ныне прииде, благословен Приходяй во имя Господне! Иже И, знаем, промыслене приходя, небесную бо высоть неподвижну соблюд, солнцу же течение хытростию правя, звездное множество неизмутом чины набдя, въздух на дыхание добре растваряа, земныя бокы на ращение всякому семени и овощу разгреваа, море многовлънное дробным песком обьдержа, источникы из глубины невидимо и зрея, речныя быстрины незаблудне водяй. Се все убо видяще, и мы глаголем: Благословен Грядый именем Господним! Кто есть Сей? Рци яве, о блаженый Давиде! - Бог Господь и явися нам! И якоже явися нам не точию пророк Давид глаголет, но и Павел апостол, сведетельствуя Ему, глаголет: Явися благодать Божиа спасителнаа всем человеком, наказующи нас. Не овем есть, но всем убо июдеом и еллином крещением спасение даеть, обще благодание крещение сътворив! Идете убо вси от Галилеа в Июдею! Да идем с Иисусом, блажен убо иже в путь грядет с жизненым путем! Грядете убо мысленыма ногама и доидем Иордана, и крестителя Иоана и Крестящагося видим! Ему же крещение несть требе, да нам крещениа благодать дасть. Поидете, видим нашего рождениа образ назнаменаем - Крестящеся в тех водах. Идете, видите дивен потоп, зело вящий болий, иже при Нои бысть: тамо вода потопнаа человеческое естество погуби, а зде вода крещениа крестившимся Христом, умершаа грехми, оживи. Тамо Ной древом негниющим корабль съдела, а сде Иисус Христос, разумный Ной, от святыя Мариа плотный корабль съдела. Но и дивлюся Спаса нашего излиха смерению и поубожению, како Ти не довлеему от совершению, съвершену сущу младенцу родитися от жены, не довле точну престолом сущу и единосущну Отцу приати рабий образ, но аки грешник приходить ко крещению. Но не буди общаа благодать слышащим на съблазну! - Крести бо Ся всеми владый Христос и не требуя крещениа, но двояческы на ползу ны творя: первее да и водам святящую благодать дасть и всякого человека на крещение приведет. Прииде Иисус от Галилеа на Иордан к Иоану креститися от него. Еже ся ту творяше, братие, помыслити не мощно есть, мысли бо человеческы выше есть, еже ся ту деаше. Трепещеть ум, язык бежить из уст, не смея глаголати недоведомаго. Да тем видев Иоан Владыку грядуща к себе, трепетом многым обьдержимо имы сердце, кланяяся и припадаа и за нозе емля, моляше глаголя: Что твориши, Владыко! гордо ми дело въручаеши и страха полно повеление! Иордан видев Тя, Творца, ужастию ищезает! А аз ли, кал сый и прьсть и пепел и червь по земли ползя, смею такой тайне обещник быти? - Ни, Владыко: не нуди мене, творити егоже не могу! Трепещет ми плоть вся, раслабеша ми кости вся, ужасно ми есть сердце, весь в страсе есмь и в боязни! Почто нудиши мя, немощнаго, о Всемогущный, творити ми еже мне чрес силу есть! Како дръзну креститися! Како огнь сеном может ся очистити, како кал омыет источника! Како окрещу Судию, осужденный, како Тя крещу, Владыку, скверы не видя на Тебе: клятве Адамове не бысть повинен Ты, греха бо не сътвори! Како простру десницю на Тя, пропеншаго небо и землю! Како простру, раб сый, на Господень верх свои длани! Како ли освещу Тя, притраный свет сущь! Како ли сътворю молитву о Тебе, иже приемлеши незнающих Тебе молбы! Иныя крещаю, во имя Твое крещаю да веруют к Тебе, Грядущему со славою! Тебя крестя, како нареку в чие имя крещу Тя? В Отчее ли? - Но Отца имаши в Себе и весь еси в Отци! Но в Сыновне ли? - Но несть разве Тебе ин естеством Сын Божий! Но или в Святаго Духа? - Но присно Той есть с Тобою, якоже единосущен с Тобою и единомыслен и всемощен и единочестен, и с Тобою приемлет от всея твари поклон! Крести мя убо Ты, аще хощеши, Владыко; крести мене, крестителя! Простри притраную си десницю и венчай присяжением мою главу, да пред Твоим Царствием текый с венцем аки предтеча благовещу по обычаю, вопиа: Се же Агнец Божий, въземляй грехы мира сего! Иордане реко, ликоствуй со мною и веселися, и вчини быстрины своя и струями потеци, твой бо Творец пришел есть к тебе со плотию! Виде бо ты иногда Израиля сквозе себе минующа, и разринув воду свою, дал есть проход мимо ся; а ныне разлиався светле, обойми пречистое тело Сего, иже Израиль ты тогда проведе чрес тя! Горы и прегыня, холми и весцели, равнины и поля, дубравы и потоци, ломи и дрязгы, море и рекы! благословите Господа, Иже крестися в Иорданьстей реце! Се бо Владыка сею водою святить вся воды! Отвещав же Иисус рече к нему: Не брези ныне, сице бо лепо нам исполнити всю правду! Помолчи ныне, Крестителю: Мне сице строящу, з руа Моей, и хощи еже Аз творю! Навыкни послужити Ми еже Аз творю ти, не въстязай еже Аз мышлю! Не брези ныне, единако не поведай Моего Божества, единако не испущай из уст своих Моего Царства, да не уведев мучитель сатана, отбегнеть, не хотя яти Мене ратию; не брези, да приидет диавол яко на простаго человека и имется по Мя и приимет рану и язву сетную! Не брези Мене да скончаю егоже ради есмь пришел на землю и воплотился! Тайна се есть, еже ся днесь творит в Иордане о Мне и о Моих, тайна се есть. Не Мое требование скончевающу, но и целити мыслящи и язвеныя и грешныя. Тайна се есть великая и тайны назнаменание и предварение: в сих водах начертаемо человеческо пакипорождение. Не брези ныне, егда Мя видиши боголепне в Моих тварех; егоже изволша тогда творяща - к тому бывающу хвалу приложи. Егда Мя видиши пеготивыя чистяща, тогда Творца Мя естеству нарци; егда Мя видиши хромыя ристати творяща, тогда с текущима тема ногама и ты на похвалу свой язык простри; егда же видиши Мя мертвыя из гроб испущающа, тогда с въставшими славослови яко животворца; егда видиши Мя бесы изгоняща, тогда Моему ся Царству поклони; егда видиши Мя седяща одесную Отца, тогда благослови акы единого престолника, единолетника и присносущна с Отцем. Не брези ныне, сие бо лепо есть исполнити всю правду; закон уставляа есмь и закон уставлешаго Сын, да подобает Ми уставный закон прежде Самому скончяти, та же дати инем. Подоба бо Ми есть прежде назнаменати и потом истину явити; лепо Ми есть скончати первый завет, та же новый положити и в человеческаа сердца написати Моею кровию и печатати Духом; подобает Ми на крест взыти и гвоздии прибиену быти и страсть прияти такову, якоже мощи страсть ону целити и язву, яже о древе бысть ослушавшуся Адаму; подоба Ми есть снити и в адово само то место держимых ради тамо мертвец. Подобает Ми три дни мертвостию Моея плоти многолетныя смерти держание, подоба Ми есть плотную свещу вжещи иже во тме и сени смертней седящим. Лепо Ми есть к Отцу привести Адама во Мне царствующаго. Подоба Ми есть все то съделати, того бо ради и приидох в Свою тварь. Подоба Ми есть креститися се крещение, а последь единосущныа Троица крещение всем человеком дати. Даждь Ми крещение, яко девы Марии млеко; имися по Мою главу, юже чтут серафими, имися по ужику твоея деснице, имися яже есть сего ради сотворена Мною и Духом и Отцем Моим; имися по Мою главу, за нюже держайся доброчестием николиже не утопнет в зле. Крести Мене, Емуже есть крестити верующаа водою и духом и огнем: водою же иже может омыти грешныя скверны, духом могущим земныя претваряти, огнем иже может ижещи безакониа терние! Се же все слышав Креститель, и внем си в ум разум Спасов и въмести в тайное все еже прият, послужи божественому повелению, беаше бо сумнелив, а и послушлив. И свою десницу простер трепещущу и велми радующуся Владыку крести. И ту сущим иудеом помышляющим в себе и к себе беседующим, еда без ума помышляхом в Иоана больша суща сего Иисуса, еда впустьшь разумевахом Оного унша сего: А не се ли се само крещение Крестителя Иоана больша сказает? Не сей ли крестит якоже вящьший сый, а Сей крестится от него якоже хуждьший сый? - Тако и ся пронесши славе всюду от неведущих строимыя тайны. Единый Бог естеством Отец единороднаго Сына, иже Един весть изряд испытане, егоже Един роди без вреда, управляа блазнящихся мыслию иудейскы, отверзе двери небеснаа и посла Святый Дух видом голубином на главу Иисусову, акы пръстом показуа новаго Ноя и Творца Ноева, истопнути хотяща человечя естества добраго правителя и кръмника. Се же и Сам с небесе възглашаше велми зело: Сей есть Сын Мой възлюбленый, Иже изволих! Сей, а не он; Сей и не Иоан Креститель; Сей же отМене рожден есть прежде век всех, а не иже прежде от Захариа прозябну, но Иже от Мариа Ся роди плотию, а не иже от Елисавети ся яви, не начающися ей, но иже с вами възрасте, но Иже со Мною посла Дух Святый к Себе и паки Иже посла, тожде приат Дух. Сей есть Сын Мой любимый, Иже изволих! Сын Ми есть присный, а не чюждь, Сын единосущен, а не разносущьем: единосущен со Мною по невидимому, а единосущен с вами по видимому, разве греха. Сей, есть Иже со Мною, сотвори человека, иже не извратен бы человек. Сей есть Сын Мой възлюбленный, Иже изволих! Не ин есть Мой Сын, а ин Мариин Сын, не ин, иже во яслех лежа, а Ин, Емуже ся вълсви поклониша. Но Той есть Сын Мой любимый, Той невидимый и разумеваемый. Не ищи Ему плоти и отца на земли, без отца бо есть доле; не ищите Божеству Его матере на небесех, без матери бо есть горе. Не отлучайте Божества Ему от человечества Его, неразлучно бо то есть и неизмесно по единьствении. Ни Бога нага, ни человека съвершена с гола зовете Христа, но и Бог и человек Сей есть Сын Мой, Егоже изволих! Сего послушайте! О великое чюдо притранное! Сын Ся крестит, Отец с небеси сведетельствуеть, Дух акы голубь прилетев показает, к Кому глас той есть! Поистине бо велика есть строимаа тайна, велика и пречюдна и преидущи всяк ум: Троица Ся в Иердане реце являеть и ту Ся утверди едино существо Божества, паче же рещи: едино Божество в трех Ипостасех уведено бысть. Сущеи ту июдеи ужасошася страхы, Иоан ся дивить, Иордан ся освяти и вся тварь ся обнови, Христу всех нас Богу крестившуся Иоаном и все естество съвершено освятившу. Сей глас по крещении о Единороднем Сыну бысть на Иордане Отцем възглашен, а егда преобразися Иисус зрящем учеником: просиа лице Его яко солнце. Сей же паки глас спусти: Сей есть Сын Мой възлюбленый, Иже изволих! Того послушайте, аще речеть: Аз и Отец едино есве; Того послушайте, аще речеть: Видевый Мя виде Отца; Того послушайте, аще речет: Отец во Мне и Аз во Отци; Того послушайте, аще речеть: Пославый Мя болий Мене есть! То к строю плотному сей глас приложите, аще речеть: Се есть Моа плоть и Моа кровь, юже за вы проливаема на оставление грехом! То показаемо видите, аще речеть: скорбна Ми есть душа до смерти! - к души Его, а не к божеству Ему печалное то приатие приложите. Аще речеть: Кого Мя глаголют, человеци суща Сына человечя - отвещай со Петром великым к Нему: Ты еси Христос, Сын Бога живаго, и Тебе подобает слава, честь и покланяние в бесконечныа векы. Аминь. Никольский Н. К. Материалы для истории древнерусской духовной письменности. СПб., 1907. |
|
|