Благодать Богови отвръзающему наша уста и дающему нам слово на похвалу всех святых, иже во всем мире от века и доныне добрым житием и благоверным тръподушием Богу угодивших: великих праотец и блаженых патриарх, богодухновеных пророк и непорочных праведник, в царех же и князех и во всякой власти, и судиах, святых же и връховных апостол и преславных евангелист, благовестник же и великих исповедник, честных святитель и крепких священномученик и преподобных черноризец, постник же и пустынник, и за имя Христово пострадавших святых мученик и крепких страстотерпец и достохвалных и непобедимых жен, яже в немощи плотстей всю диаволю попраша крепость, уповаша бо на Христа Сына Божия, и Того крестом въоружившеся, необорими от враг пребыша. Там днесь всяка церкви празднуеть память святых мученик, Бог бо их прослави, за Негоже пролиаша своа крови, еюже злодеа и грехотворца змиа потопиша, и всю приносимую идолом уставиша кровь: ови главами усекаеми и очима избодение тръпяящи, и света без правды лишаеми, желаху бо света невечерняго зрети на небесех, и не хотяху ни слышати безаконных мучитель ласканиа лестнаго, ни приаша даемых от них даров, но обещанных им от Христа с надеждею чааху, ни въсхотеша земное скороминущее чести, но небесное искаху, не возлюбиша маловременныа света сего славы, но к безконечней тщахуся, юже приаша от Бога. Не прельстишася помыслом, ни ослабеша умом, помня убо апостола глаголюща: Никтоже вас да не прельстится ласканием мира сего, тщими словесы, мир бо си мимоидет и слава его погибает. Да ни словом тех повинушася повелению того ради и своа на идежежение предаша плоти, и слухи и язык на отрезание, да не слышат богопротивных царь хулу на Святаго Духа глаголющем, твердо бо Господне слово в своем дръжаху сердци, иже речет: Хулу на Дух Святый не отдастся ему ни в сий век, ни в будущий. Друзии же и кожи съдрание мужески тръпяху, да ветхаго человека с грехом съвлекутся и в новый освященный Христом облекутся человек, по Павлу глаголющу: Аще съвлекшеся плоти, не нази обрящемся; толико бо к Христови имеху любовь и веру, яко не токмо о всем света сего не радиша житии, но и своа телеса по удесом на раздробление даша и яко на честь, тако на мучение по Христе друг друга преспевающе, глаголаху: Ничтоже нас от любве Христовы разлучити възможет: ни скорбь, ни беда, ни изгонение, ни раны, ни живот, ни смерть, ни настоящаа, ни будущаа, вемы бо рекшаго: Не убойтеся от убивающих тело, а души не могущим зла что сътворити! Да аще наша отсекаете уды, имамы Христа врача телесом и удом давца, и се ведуще, крепко дръзаем: Луче бо есть клосну внити в Царство Небесное, нежели с целыми уды въвръженому быти в огненое озеро, ибо любящей тленное се тело удаляются от Бога. Тем благоволихом паче отити от тела и взыти к Богу! Аще ли имение наше въсхищаете - с радостию и благодарением все терпим, ведуще приати себе лучшее имение на небесех во веки пребывающе. Ныне же подвигу есть время и тръпению потреба, да за Христа пострадавшаго за ны потрудимся и приимем в день он обещаннаа нам от Него благаа! И еще бо мало и Той Сам приидет в силе Божий и в славе святых аггел и въздаст комуждо по делом его. Аще ли разлучаете ны от братиа, от чад же и родитель, или изгоните от отечества и града, и в заточение посылаете, - не стужаем си, "не имамы бо зде града пребывающа, но грядущаго взыскаем". Пришелци бо есмы вси и телеса, от нихже внезапну и не хотяще отидем, да аще не ныне за Христа славно умрем, обаче всяко и помале умрети имамы; того ради и нынешнею за Христа смертию безконечнаго живота купим! Наше бо житие на небесех, отнюду же и Спасителя чаем - Господа нашего Исуса Христа, и тамо имамы отечество - Гръний Иерусалим, и за братию и чад - святыа аггелы, иже нашу ныне на подвиги укрепляют немощь. Да не погрешим небеснаго венца и тамо сущаа славы, еаже ради все отвръгше с надежею стражем, ждуще установлениа от Бога, известо в души апостольское имуще слово: Сыне бо, рече, не пренемогай показанием Господнем, мало бо зде искушени, болше в будущем веце от Него въсприимем. Аще ли в водах ны погружаете или огнем съжигаете, мы не устрашаемся, сих бо мук днесь или утро конец будет, вечной же муце несть конца, в нюже грешници с богоборци и вси отвръгшеи Христа въвръжени будут. Огнь бо их - рече пророк - не угаснеть и червь их не умреть, и луче бы им да ся быша не родили, егда услышат с прещением глаголюща к ним Христа: Отъидете от Мене, проклятии, в огнь вечный, уготованный диаволу и аггелом его! Того ради не поклоним капищем колену, пишет бо ся: бози, иже не сътвориша небеси, ни земля - тии да погибнут; и с несмыслеными человеки работающими им. Но живому Богу верою поклонимся, Имже створена быша вся видимаа же и невидимаа! Ни жрем бездушным идолом: идоли бо языческии - сребро и злато, дела рук человеческих, николи же бывши в чювстве; имже подобни суть вси надеющиися на ня. Но пожръшемуся за ны Сыну Божию събою жрътву принесем! Не служим бо твари паче Творца, не чтем огня, не работаем солнцу, не даем требы горам, ни кладязем с источники Божия славы, си бо вся на работу человеком Богом сътворена быша. А Бог един есть. Его милость безчислена и человеколюбие неизреченно, иже не требует от человека ничтоже, но Себе устрои на благотворение, даай дождь с небесе, и времена обилнаа, о Немже прославишася древнии праотци Енох, Ной, Сим и Авель, иже не повинушася вражий душегубней льсти, Его же патриарси видети желаху Авраам, Исаак и Иаков, иже верою победиша царства и не погрешиша обещанных им от Бога даров. О Нем же прорицаху пророци Моисей и Давид и с Еремиею Исаиа, въплощениа Его дозряще, имже съдеа всему миру спасение. Его же проповедаша во всех странах апостоли, и Того именем велика в языцех знамениа и преславнаа съдеашася чюдеса. Его же любяще преподобнии мужие, оставиша мир, домы и богатство "и едини в пустынях скитающеся, в горах, врътепах же и пропастех земных", богоугодно пожиша. За Него же страстьтръпци и святии мученици руганием и ранами искушени быша, в узах же и темницах озлобляеми и убийством меча умръше, своа к Богови възнесоша душа, прославиша бо Е на земли, и Той прославит их на небесех. Тем светла есть днесь всех святых память и многи чести достойно тръжество. Небеса с аггели веселятся и земля с человеки освящается. Их же и мы похвальными гласы, яко цветци венчающе, глаголем: Радуйтеся, богоизбраннии святии мученици Георгие крепкий, Феодоре пресловущий и великий Димитрие, Христова плъка непобедимии воеводы, помощници и заступници всем христианом, силнейше меди и железа твердейше! Огнь вас не съжже, вода вас не потопи! Вашего мужества и крепости дозря, пророк глаголаше: "Чада Божия, укрепитеся о Господе Бозе вашем, яко не имат вас коснутися мука, аще бо в злобе безумных страсть приасте", но в руце Божии душа ваша пребудет, Сам бо яко злато в гръниле искусил вы есть и обрете вас достойны Себе. Вам же есть глас: Проидохом сквозе огнь и воду, и вселистеся в нестареющуюся жизнь, юже смертию куписте. Не яко искры по стеблию текосте, но яко солнце чюдесными лучами мир освящаете! Радуйтеся, славнии священномученици Клименте великий и блаженый всеми Игнатие с премудрым Дионисием, иже ризу тления съвъргше и нази въоружившеся о Христе, попрасте биющих вы всю силу раздрушивше, диавола поруганна и посмешна показасте. Камение безценное, Господни подражатели, иже на Того вере своа утвръдивше душа и Того нетрудно последовавше стопам! И яко краснаа украшениа Христовы язвы на теле носяще, величастеся, светлыа и немръцающиа звезды, всю церковную украсивше твердь, целии голубие, иже не птенца, но своа уды на отсечение за Христа предасте! Вы и змий бысте мудрейши, все тело на муки без пощадениа предавше, точию главу - Христа - невредно съхранисте, Егоже пред многими исповедали есте послухи: Бога вкупе и человека распята плотию и погубившаго крестом мучительство диаволе о твердыа вашеа веры и зело великия к Богу любве, еюже и по смерти живи есте, всех земных миродержителей силнейше и честнейше, Церковь и князей славнейше и всего священническаго чина святейше; ваша мощи истачают чюдес реки, и ваша святаа имена, верою призываема, человеческиа врачують страсти, исцеляют различными болящаа недуги, прогоняют злодейца пакости, творящаа нам демоны, избавляють от всякоа нужда, беды и печали, и от уз дръжимы раздрешают, и в темницах томимыа изводят, в бранех помогают всем верою призывающим вы; плавающих в мори спасают и на путех съблюдают, и на всяком месте от всякого заступают зла. Вся бо можете данною вам от Бога благодатию! Си же о мученицех речена быша, а еже о апостолех - кто доволен сказати тех труды и преславнаа по Христе подвизаниа! Кътораа уста по достанию похвалити възмогут богоизбранныа законодавца, Христовы други и приставники святыа Его Церкве, прежде сътворениа всего мира Богом нареченныа святыа, яко быти им непорочным в любви Христове, яже бо им бяху нарекованна Отцем Господа Бога и Спаса нашего, сиа Сыном Его Исусом Христом с известием обещанна. Вы бо - рече - друзи Мои есте, и не оставлю вас сиры, но прежде иду и уготоваю вам место на небесе; да идеже буду Аз, ту и вы будете, да асте и пиете на трапезе со Мною в Царствии Отца Моего! Тем же огнен подобно имети было язык к похвалению святых връховных апостол, яко на тех Дух Святый в образе огненем сниде и освяти тех душа и телеса, дасть им всеми глаголати языки и посла их во вся концы земныа, вся человеки от прелести диавола избавити, ихже очистивше от скверны греховныа водою божественнаго Крещениа, в пакибытие породиша и сыны света сотвориша, и вся ны верою к Богу приведоша. Радуйтеся, святии преславнии връховнии апостоли Петре и Павле, мнози бо изгоними, яко Тебе ради многи искупишася. Богу нашему слава честь! Никольский Н.К. Материалы для истории древнерусской духовной письменности. СПб., 1907. |
|
|