Присно жадаяй Бог нашего спасения, въсхоте Своимь милосердиемь обновити естьство наше, грехъми суще обетшано. Темь и в нашю плоть истиньно облечеся, хотя направити ногы наша на путь истиньный, не терпяше бо Своего образа в тленье впадъша зрети, егоже испьрва в райстей пище владыку всей твари устроил бе, завистью же дьяволею прельщена и волею за ны пострада, умерщвяя прегрешения наша, и въскрес из мертвых, възиде пакы на небо и седе одесну- //46об. ю Отца и в 50-ный день днешний Святый Дух присла огньны языкы учеником Своим раздая, якоже им обещал по въскресении Своемь, глаголя: Въсхожю к Отцю Моему и Отцю вашему; у небо есть вам, да Аз иду, аще бо Аз не иду, Параклит не придет к вам, еже есть Утешитель; аще ли иду, то умолю Отца иного Параклита дасть вам, и в вас будеть Дух истиньный, и Тъ научить вы и въспомянеть вся, елико аз глаголах вам. И въздвиг руце, благослови я и рече: Шедъше, сядете в Ерусалиме въкупе, дондеже облечетеся силою свыше. И се рек пред ними, възнесеся на небо. Днесь же прияша силу Святаго Духа апостоли, и начаша глаголати всеми языкы, якоже Дух даяше им провещати. И шедъше, проидоша всь мир, яко молния, учаще и наставляюще вся на разум Божий когождо языкомь своим; така ти есть милость Божия на нас и честь //47 сего дне, яко не хощеть смерти грешником, нъ паче обращению и покаянию. Рече бо Сам: Не требують сдравии врача, нъ болящии; не придох бо призвать праведьных, нъ грешных на покаяние. Темьже и мы не ленимься такого милостива имуще Владыку, нъ всяку злобу отвьргъше от себе: зависть, клевету, студодеяние и все неподобное деяние, - и с чистою свестью придем в Божию церковь, и, страхомь в ней стояще, просим от Него отпуста грехов и вечныя жизни, да достойни будем приступити к пречистым тайнам Телу и Кръви Господни, темь достойни творить Обещника Небеснаго Царствия. А иже неочищьшеся приемлють, то повиньни суть огневи вечному, Сам бо рече Господь Бог нашь: Ядый плоть Мою и пья кръвь Мою жив будеть въвекы, и егоже с верою просите дамь вам! То вси слышавше, братье, въспрянем и не точью сло- //47об. вомь крестьяни нарицающеся, нъ подвигнемься добрая дела стяжати: смерение и любовь к всем, кротость, пощение, - то бо очищаеть душю и тело и ангелом равны стваряеть и на небо възводить. Милостию же беспрестани творите, та бо омываеть вся прегрешения от нас и небесная врата отверзаеть, и ярость Божию на кротость и на милость претваряеть, милостыни бо бес труда на небеса възводить и с дерзновениемь у престола Божия поставляеть; милостыни бо, рече, на суде хвалиться, и блажени милостиви, яко ти помиловани будуть, и немилостивен суд не створшему милости. Темьже подвигнемъся богоугодная дела творити, теми бо делы сынове Божии наречемъся и, сию жизнь добре поживше, и будущих благ сподобимъся с всеми от века Богу угодившими о Христе Иисусе Господе нашемь, Емуже слава и ны- //48 ня и присно и в векы веком. Аминь. "Соборник" XIII ст. Рас. нац. бібл. |
|
|