Трие преславная Господня чюдеса ис пръвых времен: первое на землю сниде, второе - из мертвых въскресение, третее - на небеса възнесение. Илиа бо аще на небеса взят бысть, Илиа бо место измени от места, а Христос взыде отнюдуже и сниде. Пророк бо Давид о вознесении Господни рече: Взыде Бог воскликновении, Господь в гласие трубнем! - и паки взыде на херувим и лете, лете на крилу ветренюю. О сем и Аввакум рече: Възнесеся солнце и луна ста в чину своем,- Христа солнцем нарече, а луною Церкви именовася. Милосердый же, усмотрив тацех дел высоту, и рече: Се Христос приде, скача по горам и прескача холмы,- скачание именити: с небесе бо в чрево Девы сниде, от чрева в ясли, от яслий же на крест, с креста же в гроб, от гроба же Бог воста, възнесеся на небо. Вся нас ради и Христос створи. Енох и Илиа взята быста на небеса, Господне възнесение назнаменаста. Днесь на небеса Господь сниде. Блаженный Иов птицей Господа нарече, яко тело пръстное от земля вознесе, яко возношениа тайн не разумеюще Июдеа, виде Господа Бога и Спаса нашего вознесение на небеса. Всех чюдние праздник днесь, бо небесный круг ликовстьвуа, облаком подъемлеть Господа на неизреченый Отчь престол с плотию въсходяща, и вся лики аггельскиа на веселие събрав, единогласно трисвятую песнь повеле воспевати, глаголя: Слава в вышних Богу, и на земли мир, в человецех благоволение! Днесь невидимых бес вся лесть низложися, днесь ликуа и веселяся, пророк Давид вопиет, глаголя: Вознесися на небеса, Боже, по всей земли слава Твоя! Днесь апостольский лик без сумнениа со аггелы беседуеть, понеже Христос человеческую плоть приим и обожи ю воскресением Своим, на небеси одесную Отца посадив, якоже рече еваггелист Лука: Поимый си ученики Своа, изведе а вон до Вифаниа и рече им: Се Аз послю обетование Отца Моего на вы, вы же сядете во граде Иерусалиме, дондеже облечетеся силою свыше. И въздвиг руци Свои, и благослови а, яко отступи от них; и се облак светел подъят И пред очима их. Не токмо ученицы едине бяху зряще, но и рождьшиа Его, ини народи мнози з боязнию зряху Христа на небо с плотию възносима. Чюдо бо бе всех чюдес предивнее и грозднее, егда от земля взяся, аки человек бе видим, а егда же на высоту к небеси восхожаше, боле видетя бяше; егда же доиде до небеси, и вся заиметь небеса славою Божества. И неисповедимо бе величествие Его, яко и небеси не видети в заре лучь славе Его; аггелом же послушествующим о видении и второе поведающе приход Христов. Два аггела сташа в одежи светле и реста ко апостолом: Что дивитеся, мужи Галилейстии и что зрите на небо? Се Исус, вшедый от вас на небо, тако приидет, якоже видесте возносящагося, паки бо приидеть, хотя судити живым и мертвым, и воздасть комуждо по делом, Тому предасть Отец суд весь! О, колко благодатный Владыка Христос спасениа ради нашего здея! С небеси бо приде и паки възнесеся на небеса во славе, а не яко на карабли спя, ни яко у кладезя трудом жажа, ни яко на жребци осле седящаго, но славно на крузе облачне нося, взыде бо на небо и седе одесную Бога, а не аки пред судиами на торжищи стоя, но Сам всей судя вселенней и апостолом судийску власть преда, глаголя им: Егда сядет Сын человеческий на престоле славы, и вы на двунадетеся престолу будете судящу обеиманадесять коленома Израилевыма. Яко подъя облак Христа, тако и мы по речению апостола Павла "в облаце восхитимся". Якоже Господь взыде восклице и в гласи трубне, да и мы, братие, смертный облак отъимше и останемся злобы и неправды, да всегда с Господом будем. Днесь, вернии, Възнесение Господне духовней божествене почтем, яко лепо христианом, а не яко невернии - ядьми и пианством, играми и пустошными и песньми. Но празднуем, вернии, к церкви текуще без злобы, нищая же и сироты милующе, бедным помагающим, церковным слугам честь творяще: аще бо земных князий слугам честь воздати, колми паче достоить служителем Небеснаго Царя честь и дары даяти! - То бо въжове суть к Богу! Мир же и любовь межи собою имейте, се бо глава добродетели; смирение же всяк грех побежаеть. Сам бо Господь Бог смирився нас ради и бысть человек плотию, страсти волею прият и смерти вкуси, в третий день въскресе яко Бог и възнесеся на небеса. Смиримся и мы, вернии, да вознесемся! Нас ради Господь рече яко: Възносяйся смирится, а смиряйся вознесется. Милостыню же по сим да створим, яко бо вода огнь гасит, тако и милостыня грехи. Богу нашему слава ныне и присно! Никольский Н. К. Материалы для истории древнерусской духовной письменности. СПб., 1907. |
|
|