Аз убо, о друзи и братье, надеяхъся на всяку неделю боле собрати в церковь людий на послушание божественых словес, ныне же мне приходить. Нъ аще бых о собе глаголал, то добре бысте творили, не приходяще; ныня же Владычня възвещаю вам и грамоту Христову прочитаю вам. Якоже бо кто грамоту цесареву или княжю принесеть в град под рукою его сущим, не пытають житья принесъшаго ю: богат ли есть или убог, ли грешен, ли праведьн, нъ тех точью чтомых послушають и тщиться, абы ничтоже их не //23об. забыло. Аще ли котораго слова не гораздо услышить, то прашаеть слышавшаго. Аще ли безъчинен человек голку створить, то, бьюще, отгонять и акы пакость творяща. Да аще от земьнаго князя толико внимание будеть, колми паче сде внимати подобаеть вам, идеже ангелом Владыка беседуеть! Темь молю вы, пришедъших сде: да поучаете неприходящих и увещаете я приходити к церкви, вы бо вкусите от меду учения, они же никакоже. Вкусите, рече, видите, яко благ Господь! Весте бо, яко изводяй достойнаго от недостойнаго, яко уста суть Христова. А понеже убо сия изрекох, послушайте же, да поучю вы о молитве: тою бо исправляеться всяко доброе, аще от умилена сердца исходить, яко благоухание к Богу въсходить. Того ради и пророк глаголеть: Да ся исправить молитва моя, яко и кадило пред Тобою! Почто же, яко и кадилу, молиться исправити молитве? Имьже темьян имееть в собе //24 благоухание, егда на огни будеть, тако и молитва - егда от горяча сердца будеть, то яко благоухание к Богу въсходить. Не разуместе ли поемаго, аще и на болшая поучю вы. Аще и внимаете и хощете научитеся, аще ли не внимаете, аз убо умолкну и не хотя, вы же осужени будете, имже и учащаго имеюще, не внимасте. Како бысте хотели, толик путь ити, елико же ужьская царица приде да слышить премудрость Соломоню; и се боле Соломона сде. Не мене деля, аз бо грешник есмь, нъ евенгельскаго [Так в публикации - О.Л.] ради проповеданья и апостольскаго учения. Поведите ми, братие, аще въсходящю солнцю, съмьжарить кто очи свои, не хотя видети света сего и глаголя: Лучьши есть тма света! - или помилуеть его кто, а не паче возненавидить и отвержется его? То же и словеси учения имать, свет бо слово Божие в Писании наречеться, и тъ есть болий видимаго сего света. Се бо плъ- //24об. тьстеи очи просвещаеть, а он душевнеи. Того ради и пророк Давид глаголеть к Богу: Светилник ногама моима закон Твой и свет стезям моим! И пакы Исаия: Людье седящии в тме видеша свет велий! Кто убо помину нехотящаго света видети, еликоже вас приходить в церковь, понужайте нехотящих приходити, и никтоже не глаголеть, яко: непраздьн есмь инех делех. Нъ помысли оны званыя на цесарьскую вечерю, иже многы такоже изветы створиша: ов рече: супруг волов хощю искусити; ов же: села купленаго съглядати; ин: жену поят. И про то разгневася на них цесарь. Единого часа не можете ли отлучити Богови? Въпрошьшю же вы и отвещаете ми: аще злато или сребро по вся дни раздавал бых, или мед любо си пиво, - не бысте ли приходили сами и непризываеми и друг друга бесте варили? - Ныне же словеса Божия разда- //25 ваю, лучьша паче злата и каменья драгаго и слажьша паче меду и ста - и лишаетеся их, не приходяче к церкви! Тех же и злословлю и укаряю, якоже вас, приходящих, хвалю и благословлю. Кождо же вас молю вы, приходящих сде и въкушающе духовнаго сего меду: аще суседа имате, или родина, или жену, или дети, то позывайте к церкви вся и поучитеся душеполезным словесемь, да и сде богоугодно поживше и вечных благ наследници будем о Христе Иисусе Господе нашемь, Емуже слава. "Соборник" XIII ст. Рас. нац. бібл. |
|
|