Владыко Господи Вседержителю, Боже отец наших, веком Творче и концени Сведителю, исчитая лета и времена измеряя, живущим на земли животу же и смерти имея власть! Не остави мене, Господи, отинудь растлети в беззакониих, ни гнева, противу делом достойна, не посли на мя, но услыши глас молитвы моея! Благоволив превести мя житейскую пучину мноземи волнами греховными погрязнути хотящаго, иже и сего дне долготу сподобил еси сконцати и к началу нощи приблизитися, еяже не чаю прейти, бесовьскым объят мечтанием и тмою греховною покрываем, в нюже спаси мя от всякаго совета вражия и всякыя скорби и напасти, нужа и печали и скверных мыслей, яже беспрестани стужают окаанней ми души! Ты бо еси Бог мой и всякаго добра податель, иже и преже прошениа дая, изобилова рабом своим благаа! помяни смирение мое и отверзи устне мои на славословие Твое, и приими вечернюю сию молитву, и дай же невозбранно ми тещи к заповедем Твоим, не вотще трудитися маловериа моего ради! Ты бо рече: Възови Мя и избавлю тя. Избави мя, Господи, от всякыя козни диявола и управи живот мой! Се бо с страхом предстою Ти, на множество щедрот Твоих взираю выну и умилением душа припадаю. От неполезных мыслей уклони сердце мое и ум мой к Тебе впери, дайждь [Так в публикации - О.Л.] ми, Господи, отныне время покаяния, яко пришлец есмь аз, якоже и все отци мои; се бо, яко трава, заутра процветох и на вечер отъпаду и исъхну. Исцели мя, Милостиве, зле уязвеннаго греховным жалом, преже даже не отъиду и к тому не буду, яко не мертвии въсхвалят Тя, в аде же кто исповест Ти ся! Ей, Владыко, Спасе душ наших, даровавый нам надежу въскресения верующим Тя! покой душу раб Своих отец и братию нашю (имярек) и всякаго племени Христианьскаго роду, мужеска полу и женьска, и всех елико в Тя вероваша Иисуса Христа, Сына Божиа! Ты бо рече: Веруяй в Мя не умрет, но имат живот вечный, егоже и мене причастника сътвори в земли кроткых, в селех святых, в неразоримых храмех, в горнем Ерусалиме, в немерцающем свете и нестареющемся блаженном оном веце, в бесконечней жизни, идеже несть болезни, ни печали, ни въздыханиа, ни дъявола на зло подвизающа, на греха тлю творящаго, но радость неисповедима и веселие неизреченное, и праведник множество, пророк чинове, апостол ликове, мученик полци, страстотерпец хоругви, святитель събори, преподобных толпы, пустынник совокупление и святых жен крепкодушие, и святых покоище, от века угодившим Тебе, единому истинному Богу нашему, Отцу и Сыну и Святому Духу и ныне и присно и во векы веком. Аминь. |
|
|